Жулиана Мур санъат аҳлини америкаликларга қурол сотилишига қаршилик кўрсатишда фаол бўлишга чақирди. Унинг бошчилигида Голливуднинг 80 нафар актёр ва актрисаси қурол сотилишида янги меъёрлар ўрнатилишини талаб қилиб чиқишмоқда.

Жулиана Мурнинг кампаниясига Женнифер Лоуренс, Риз Уизерспун ва Ким Кардашьян, шунингдек Стив Кэрелл қўшилган.

Бу ташаббускорлар қурол харид қилишни истаган кишиларнинг соғлиги ва руҳий ҳолати жиддий текширилиши кераклигини айтишмоқда.

Жулиана Мурнинг айтишича, у ва унинг ҳамкасблари АҚШда ўқотар қуроллардан ўлим топиш ҳолатлари ортаётганидан хавотир олмоқда.

"2012 йилда Сэнди Хукдаги мактабда рўй берган отишма туфайли 26 киши ҳалок бўлганидан кейин (шундан 20 нафари ўқувчилар) шу ҳақида ўйлай бошлагандим", дейди актриса.

Ўтган ҳафтада Невада штатида 5 синф ўқувчиси қўшни қизни отасининг қуролидан шунчаки чақирганида келмагани учун отиб ўлдиргани жамоатчилик орасида шов-шувларни келтириб чиқарганди.

БМТ маълумотларига кўра, АҚШ кўчаларда ўқотар қуроллардан отиб ўлдириладиган тинч аҳоли вакиллари сони кўплиги бўйича тузилган рўйхат бешлигига киради.

Маълумот учун, АҚШ конститутциясига иккинчи ўзгартириш киритилганидан кейин фуқароларга ўқотар қуролларни сотиб олиш ва ундан фойдаланиш ҳуқуқи кафолатланган. Бу қоида турли штатларда турли чекловлар билан амал қилади.