"Самвел Бабаян МТЖга бош мураббий этиб тайинланганидан кейин кўплаб мутахассислар бир нарсани айта бошлашди, "Марказ энди ишлайди"
"Аввал ҳам ишлаган, лекин ишлашда ишлаш бор", деб ёзади ўз мақоласида championat.asia журналисти.

У "Бабаяннинг Марказ олдидаги беш шарти терма жамоада нимани ўзгартирди?" сарлавҳали мақоласида Самвел Бабаяннинг талаби билан витаминизация, чартер рейслар, меҳмонхона билан боғлиқ масалалар ечимини топгани, шунингдек, мураббийлар "Instant Football" компанияси хизматларидан фойдаланишни бошлашгани, илмий-техник гуруҳ тузилганини қайд этади.

Қуйида ушбу мақола ўзгартиришларсиз келтирилган.

ВИТАМИНИЗАЦИЯ
Деярли икки йил давомида бу масала сайтимиз томонидан энг оғриқли муаммо сифатида кўтариб келинди. Азиз Ҳайдаровни ОК учун ҳомийлик қилгани аллақачон ўз сирини йўқотиб бўлди. Шу кунгача терма жамоамиз машғулотларида, ҳа айнан машғулотларда витамин воситалари бўлмасди. Балки меҳмонхонада махсус осма уколлар бўлгандир. Лекин машғулот атрофида бўладиган витаминлар ўрнида газсиз сув ва лимон чой бўларди.
Айни пайтда ҳақиқий витаминлар келтирилди. МТЖнинг ҳар бир машғулотида ундан фойдаланиляпти. Ҳозирча 4 хил турдаги витаминлар келтирилган. Улардан иккитаси машғулот пайтида тикланишга ёрдам берса, яна иккитаси мушаклар учун мўлжалланган. Ишонаверинг, авваллари бундай бўлмасди.

ЧАРТЕР РЕЙСЛАР
"Хоххот воқеаси" ёдингиздами? Ҳа бу ўша ўйин, Жанубий Кореягача бизни толиқтириб бўлган узоқдан - узоқ рейслар. Ўшанда терма жамоамиз Тошкент - Пекин - Хоххот - Владивосток - Сеул йўналиши бўйлаб манзилга етиб борган эди. Айрим шаҳарларда 4 соатгача рейс кутилган. Табиийки, ўз майдонида терма жамоамизга қарши пухта тайёргарлик кўрган Жанубий Корея катта бўлмаган устунлик эвазига ғалаба қозона олганди.
Ҳозирча терма жамоа сафарда учта ўйин ўтказди. КХДРга чартер рейсда борган маъқул. Бошқа йўл йўқдек. Аммо Баҳрайн, Филиппин ва Қатар каби давлатларга биз бирон бир давлатга учиш орқали борар эдик. Бугун харажатни бироз оширган ҳолда футболчиларнинг тетиклигини сақлаб туришга эришилди. Филиппинга ҳам, Баҳрайнга ҳам боришда терма жамоамиз чартер рейс хизматидан фойдаланди. Маълум бўлишича, Қатарда бўлиб ўтадиган Яман билан ўйин учун ҳам шу анъана давом этади.

МЕҲМОНХОНА
Шу кунгача МТЖ уч юлдузли меҳмонхонада истиқомат қиларди. Бабаяннинг биринчи талабларидан бири "база"ни алмаштириш бўлди. Натижада МТЖнинг турар жойи ўзгарди. Бассейн ва саунага эга меҳмонхона аввалгисидан замонавийроқ кўриниш олган. Бу эса легионер футболчиларнинг руҳиятига ижобий таъсир ўтказади.

"INSTANT FOOTBALL"
МТЖ мураббийлар штаби "Instant Football" компаниясининг хизматидан фойдаланишни бошлади. Мазкур компания мураббийга легионер футболчиларнинг сўнгги ўйинларда қайд этган натижаларини видео ва пдф кўринишда тақдим этади. Шу билан бирга терма жамоанинг рақиблари тўғрисида 40 саҳифага яқин маълумот беради. Унда сиз қайси футболчи нечанчи дақиқада, қайси чизиқда ўйнаганидан тортиб, қанча тўғри пас бергани-ю, қай пайтда хатоларга йўл қўйганигача маълумотга эга бўласиз. Ундан ташқари рақиб жамоа ўйинини қидириб ўтирмайсиз, тизим орқали юклаб олсангиз кифоя. Хуллас компаниянинг имкониятлар катта, аммо бу пул туради.

ИЛМИЙ-ТЕХНИК ГУРУҲ
Сербиялик мутахассис Деян Журжевич ва яна икки нафар ходим билан илмий гуруҳ тузилди. Журжевичнинг асосий вазифаси олий лига ўйинларини кузатиш ва рақибни яхшилаб ўрганиш бўляпти. Баҳрайн ва Филиппин билан бўлиб ўтган ўйинларда унинг хизмати катта бўлди. Айниқса, рақиб футболчилари борасида бераётган маълумоти. Яна икки нафар ходим эса машғулотлар пайтида терма жамоа аъзоларининг ҳолатини кузатиб, футболчиларни машғулотдаги фаолликларини назоратга олганлар.
Марказ вакиллари МТЖга оид танқидларимизни ғаразлик деб билмаслигини сўраган бўлардик. Тўғри йўл, бу ғалаба дегани, ғалаба эса мукофот пуллари дегани. Терма жамоамиз ғалаба қозонаверса, биз мукофот олмаймиз, сиз оласиз. Бизга ғалабанинг ўзи кифоя. Агар қолган муаммоларни ҳам бартараф эта олсангиз, биз албатта ЖЧга чиқамиз.