Макка шаҳридаги Ал-Ҳаром ва Мадинадаги Пайғамбар масжиди имоми ҳисобланувчи Моҳир ал-Муайкли 16 октябрь, жума куни Москвадаги жоме масжидида маъруза қилади. Бу ҳақда Россия федерацияси мусулмонлари диний бошқармаси матбуот хизмати хабар берган.

"Москвадаги жоме масжидида бу ҳафтадаги Жума ибодатига икки муқаддас масжид имомининг маъруза қилиши барча мусулмонлар учун ҳақиқий байрам бўлади", дейилади хабарда.

Маълумот учун, Моҳир ал-Муайкли Москвага 11 октябрь куни келган, у бу ерда ўтказилаётган Қуръони карим қироати танловида иштирок этган.

"Шайх Моҳирнинг Қурони каримни қандай тиловат қилиши миллионлаб мусулмонлар учун таниш. Ҳурматли шайх миллионлаб мусулмонларнинг севимли кишиси ҳисобланади, миллионлаб мусулмонлар ўз ибодатларида уни дуо қилишади", дейди Россия Федерацияси мусулмонлар диний бошқармаси раҳбари Равиль Ғайнутдин.