Қатар пойтахти Доҳа шаҳрида давом этаётган бокс бўйича жаҳон чемпионатида финалга чиққан ўзбекистонлик спортчилар ўз иштирокларини якунлашди.

Вазни 75 кг.гача бўлган вазн тоифасида иштирок этиб, йўл-йўлакай бир неча нафар кучли рақибларни мағлуб этиб келган Бектемир Мелиқўзиев финалда кубалик боксчига қарши жанг олиб борди.

Бутун жанг давомида Лопеснинг тажрибаси сезилиб турди. У кучли зарба йўлламади, аммо ҳимояни мустаҳкам ушлаб, очко учун бир нечта зарбалар бера олди. Бектемир эса асосан кучли зарба бериш пайида бўлди, аммо ҳимояга етарли аҳамият бера олмади. Дастлабки икки раундда кубалик, учинчи раундда Мелиқўзиевнинг устунлиги қайд этилди — 29:28, 29:28, 29:28.

19 ёшли ҳамюртимиз ўз фаолиятида илк марта иштирок этиб, кумуш медални қўлга киритганини инобатга олсак, бу мусобақа Бектемир учун катта тажриба вазифасини ўтади.

Шу тариқа, Ўзбекистон делегацияси жаҳон чемпионатида 6та медалга эга бўлди — 3та кумуш ва 3та бронза бор.

Бу натижа эса терма жамоанинг жаҳон чемпионатларида медаллар сони бўйича кўрсатган энг яхши натижаси бўлди.

Эртага Элнур Абдураимов (-60 кг) олимпиада йўлланмаси учун рингга чиқади.