АҚШ ҳудудида Қуролли кучлар шахсий таркиби ва ҳарбий объектларга энг жиддий хавф хориждан эмас, балки маҳаллий экстремистлардан солинади. Бу ҳақда АҚШ қуруқликдаги қўшинлар генерал-лейтенанти Перри Уиггинс журналистлар билан учрашувда айтиб ўтди. Уиггинс қуруқликдаги қўшинларнинг “Шимол” қўмондонлигига бошчилик қилиб, бу қўмондонлик АҚШнинг қитъадаги қисмида жойлашган ҳарбий база ва объектларини қўриқлаш ва фавқулодда вазиятларда фуқаролик муассасаларига кўмак беришга жавоб беради.

“АҚШ ҳудудида ҳарбий базалар учун хатарлар нималардан иборат?” деган саволга Уиггинс иккиланишсиз қуйидагича жавоб берди: “Мен учун якуний хулоса шундан иборатки, бунда катта муаммо зўравонликдан фойдаланувчи маҳаллий экстремистлар ҳисобланади”. Уиггинснинг таъкидлашича, бу радикал элементлар “ўз табиати бўйича ҳеч қандай огоҳлантиришларсиз ҳаракат қилади”. 

Генералнинг айтишича, АҚШ Мудофаа вазирлиги бу муаммони ҳал қилиш йўлларини қидирмоқда. “Бу мураккабдир”, деб таъкидлаб ўтди Уиггинс. Унинг қайд этишича, бу ишдаги асосий қийинчиликлардан бири АҚШ  ҳукуматининг экстремистларнинг режаларидан “хабардорлигини” таъминлашдан иборат бўлса, иккинчиси бу хавфлар кимга қаратилган бўлса, уларни бундан ўз вақтида хабардор этишдан иборат. “Мен учун бу энг муҳим жиҳатдир”, деб айтди генерал.