Хитойнинг Хунань вилоятидаги Чжанцзяньзе шаҳридан узоқ бўлмаган масофадаги миллий парк ҳудудида дунёдаги энг узун шиша кўприк барпо этилади. Бу ҳақда Fox News хабар берган.

Хабарда айтилишича, 2016 йилнинг январида бу кўприкнинг очилиш маросими ўтказилади.

Қайд этилишича, бу кўприк каньонлар ҳудудида 300 метр баландликда ва 430 метр узунликда бўлади. Бу кўприкнинг остки қисми 5 см қалинликдаги пишиқ шишадан иборат бўлади. Кўприк бўйлаб кузатув қисмлари ўрнатилган, шунингдек, сайёҳлар учун сакраш жойлари бўлади.

Ушбу лойиҳа муаллифлари бу кўприк бўйлаб сайр қилиш учун хавфсиз шароитлар таъминланишига ишонтиришмоқда. Бу кўприк бир вақтнинг ўзида 800 нафар кишини кўтариб тура олиши айтилган.

Архитекторларнинг айтишича, бу лойиҳани Жеймс Кэмероннинг "Аватар" фильмидан илҳомланган ҳолда ишлаб чиқишган. Бу лойиҳа асосчиси исроиллик Хайим Дотан ҳисобланади. У Шанхайдаги "Экспо-2010" лойиҳасида ҳам иштирок этган.

Октябрь ойи бошида Хитойнинг Хэнань провинциясидаги Юнгтайшань тоғ тизмасида очилган шиша кўприк сайёҳлардан бирининг қўлидаги ҳароратни барқарор ушлаб турувчи идиш (термос) қўлидан тушиб кетиши натижасида дарз кетгани, натижада ваҳимага тушган сайёҳларни эвакуация қилишга тўғри келгани хабар қилинганди. Шундан сўнг бу кўприк ёпиб қўйилган.