Тошкентда ўқув-тадқиқот текстиль технопаркини ташкил этиш ишлари бошланди, дея хабар қилди Sputnik агентлиги “Ўзбекенгилсаноат” вакилининг XI Халқаро ўзбек пахта ва текстиль ярмаркасида берган маълумотига асосланган ҳолда.

Агентлик суҳбатдошининг сўзларига кўра, ўзбек томони лойиҳани Корея Республикаси Савдо, саноат ва энергетика вазирлиги билан ҳамкорликда 2017 йилда якунига етказишни режалаштирмоқда.

Режага мувофиқ, уч қаватли корпуснинг 4 минг квадрат метрдан зиёд ҳудудида ўқув хоналари, анжуман заллари, кўргазма бинолари, лабораториялар, идоралар, оранжерея (бино ичидаги сунъий экотизим) ва бошқа объектлар ўрин эгаллайди. Илмий-тадқиқот лабораторияси 1,5 минг квадрат метр майдонни эгаллаган икки қаватли бинодан жой олади. Бу ерга тўқув, бўяш-безак бериш, тикув дастгоҳлари ўрнатилади.

Технопаркда республикадаги текстиль муассасалари билан яқин алоқада фаолият кўрсатувчи дизайн-гуруҳлар ҳам иш олиб боради. Бундай ҳамкорликдан кўзланган мақсад янги маҳсулотлар турлари ва дизайнерлик ғояларини ишлаб чиқиш ва уларни амалга оширишни йўлга қўйишдан иборат.