Сурия президенти Эрон мажлиси (парламенти)нинг миллий хавфсизлик ва хорижий сиёсат бўйича қўмитаси раҳбари Оловиддин Бўрижардий бошчилигидаги Эрон парламенти аъзолари делегациясини қабул қилиб, Сурияда ва умуман Яқин Шарқдаги вазиятни муҳокама қилди.

Сурия президенти Башар Асад суҳбат чоғида Россия ва Эроннинг террорчиликка қарши курашдаги ёрдамини юқори баҳолади.

“Биз Суриянинг террорчиликка қарши курашидаги жанговорлигини оширишда дўстона давлатларнинг барча саъй-ҳаракатларини қадрлаймиз. Бунда муҳим роль Россия ва Эронга тегишлидир. Бу саъй-ҳаракатлар минтақанинг барча халқлари ва бутун дунё учун фойдали бўлади”, деб Асад айтган сўзларни келтириб ўтди Сурия телевидениеси.

Асад, шунингдек, минтақавий ва халқаро хавфсизлик ва барқарорликка хавф солаётган террорга қарши курашда Россия, Сурия, Эрон ва Ироқ билан ягона фронтни шакллантиришнинг катта аҳамиятга эгалигини таъкидлаб ўтди.

Ўз навбатида, Бўрижардий янги фронтнинг шакллантирилиши террорчиликка қарши курашга тайёргарлиги ҳақидаги сохта важлар билан беркинадиган АҚШ бошчилигидаги халқаро коалиция саъй-ҳаракатларининг инқирозга учраганини намоён қилади, деб таъкидлаб ўтди.