Microsoft асосчиси Билл Гейтс назорати остидаги Cascade Investment инвестицион жамғармаси Украинанинг қишлоқ хўжалиги соҳасида фаолият кўрсатувчи “Кернел” холдингининг 5 фоиз акцияларини сотиб олди. Бу ҳақда компания хабарида сўз боради.

Cascade Investment “Кернел” акцияларининг 3,9 млнтасига эгалик қилди.
“Кернел” Украина агросаноат секторида 1995 йилдан буён фаолият кўрсатиб келмоқда. У қишлоқ хўжалиги маҳсулотлари, жумладан, кунгабоқар ёғи, дон ва шрот (тахтакунжара) экспорт қилиш бўйича етакчи компаниялардан ҳисобланади.

Хусусан, 2013–2014 йилларда “Кернел” 5 млн тонна дон маҳсулотлари экспорт қилди. 2015 молиявий йилнинг 9 ойи (1 июль — 31 март) якунларига кўра, компаниянинг соф даромади 85,5 млн долларгача ортиб, ўтган йилни худди шу даврида 67,6 млн долларлик зарар кўрган эди. EBITDA кўрсаткичи (асосий воситаларнинг эскириши, номоддий активларнинг амортизацияси ва активларнинг қадрсизланиши билан боғлиқ зиёнларни ҳисобдан чиқаришгача бўлган операцион даромад) эса 338 млн (2014 йилда — $135,4 млн) долларни ташкил этди.