15 октябрь куни Қозоғистоннинг Остона шаҳрида МДҲга аъзо давлатлар ташқи ишлар вазирлари Кенгашининг йиғилиши бўлиб ўтади.

Ушбу йиғилишда жами 22та масала кўриб чиқилади. Бу ҳақда Россия ташқи ишлар вазирлиги тарқатган хабарда маълум қилинган.

Кун тартибида кўриб чиқиладиган масалалар орасида МДҲга аъзо давлатлар раҳбарларининг БМТ ташкил топганига 70 йил тўлиши муносабати билан ва халқаро терроризмга қарши кураш борасидаги баёноти лойиҳасини тасдиқлаш, шунингдек МДҲ давлат раҳбарларининг 2016 йилда Чернобл АЭСи ҳалокатига 30 йил тўлиши муносабати билан мурожаати каби ҳужжатлар мавжуд.

2016 йилда МДҲга 25 йил тўлиши муносабати билан иқтисодий, фан ва маданий-гуманитар соҳаларда бир қатор ҳамкорликдаги тадбирлар режасини тасдиқлаш режалаштирилган.

Бундан ташқари, вазирлар гуманитар ва ҳуқуқ тартибот соҳасидаги ҳужжат лойиҳаларини кўриб чиқади. Улар эътиборига МДҲга аъзо давлатларнинг 2020 йилгача ҳарбий соҳадаги ҳамкорлик концепцияси лойиҳаси тасдиқлаш учун тақдим этилади.

Йиғилиш якуни бўйича имзоланган ҳужжатлар ташкилотга аъзо давлатлар раҳбарлари Кенгаши йиғилишида тасдиқлаш учун юборилади.