Ўзбекистонда 2030 йилга қадар миллий энерготизим қуввати қайта тикланувчи энергия манбалари ҳисобига 28 фоиз ёки 3,443 ГВтга ўсиб, 15,8 ГВтга қадар ортади. Бу ҳақда 15 октябрда эълон қилинган “Миллий иқтисодиётнинг паст-углеродли ривожланишга ўтишда Ўзбекистонга кўмаклашиш” лойиҳасида сўз боради.

Ҳужжатда қайд этилишича, кўрсатиб ўтилган режаларни амалга ошириш йилига 11,4 млрд кВт.с электр энергияси ишлаб чиқариш ва 3,9 млрд куб метр табиий газни иқтисод қилишга имкон туғдиради. Мазкур стратегия БМТ Тараққиёт дастури ҳамда Ўзбекистон Республикаси Иқтисодиёт вазирлигининг ҳамкорликдаги лойиҳаси доирасида ишлаб чиқилди.

Унга кўра, 2030 йилгача Ўзбекистонда қуёш станциялари қуввати 2 ГВтни ташкил этиб, 5 млрд кВт.с электр энергияси ишлаб чиқарилишини таъминлайди.

Гидроэнергетика соҳаси қуввати эса кўрсатиб ўтилган давр ичида 938 МВтгача ортиб, қўшимча равишда 2,599 миллиард кВт.с энергия ишлаб чиқарилади. Биогазли қурилмалар қуввати 465 МВт ва 3,72 миллиард кВт.с, шамол қурилмалари 40 МВт ва 80 миллион кВт.с га ортиши белгиланган.

Расмий маълумотларга кўра, ЯИМ ўсиш кўрсаткичларининг йилига 8-8,5 фоиз даражасида ўсиб бориши шароитида Ўзбекистонда 2030 йилга қадар энергия манбаларига бўлган эҳтиёж 2013 йилга нисбатан 25,5 фоизга ортиб, 43,5 миллион тонна нефть эквивалентини ташкил этади. Ўзбекистон мутахассисларининг ҳисоб-китобига кўра, Ўзбекистоннинг қайта тикланувчи энергия манбалари қуввати 51 млрд тонна нефть эквивалентини ташкил этиб, техник имкониятлари 179,8 млрд тонна нефть эквивалентидан иборат.