Россия фуқаролигига эга 2 шахс Сингапурда йўқолиш арафасида турган Гамильтон тошбақаларини контрабанда йўли билан олиб кетишга уринишгани учун суд қилинди ва 15 ойлик қамоқ жазосига тортилди.

Channel News Asia нашри хабарига кўра, 38 ёшли Максим Павлычев ва 34-ёшли Алексей Радков шу йилнинг июлида қўлга олинганди.

Аниқлик киритилишича, ўшанда Индонезиядан Бангладешга учиш йўлидаги Чанги аэропорти ходимлари уларнинг ёнидан 206та тошбақани топишган, тошбақаларнинг 27таси бу вақтда ҳалок бўлиб улгурганди.

Сингапур қишлоқ хўжалиги ва ветеринария бошқармаси маълумотига кўра, бу тошбақаларнинг умумий нархи қора бозорда 90 минг долларга тенг ҳисобланади.
Терговчиларнинг айтишича, россиялик контрабандачиларга Индонезия фуқаролари бу жиноятни амалга оширишда ёрдам беришган.

Айни вақтда тирик қолган тошбақалар Сингапур ёввойи табиатни муҳофаза қилиш бошқармаси назоратига топширилган.