Туркия полицияси мамлакат пойтахти Анқарадаги терактларнинг икки ижрочисидан бири ИШИД аъзоларидан бирининг акаси бўлган, деб ҳисобламоқда. Бу ҳақда The Guardian нашри хабар бермоқда.

Туркия ҳуқуқ-тартибот муассасалари маълумотларига кўра, Юнус Амир Алагўз исмли шахс портловчи қурилмаларни портлатган икки кишидан биридир. У ИШИД аъзоси деб тахмин қилинган ва Суручда теракт уюштирган Абдураҳмон Алагўзнинг акаси бўлган.

Полициячилар иккинчи террорчининг номини ҳам айтдилар, бу Умар Дениз Дундар исмли шахс бўлиб чиқди. Террорчиларнинг шахслари теракт жойидан олинган ДНК намуналари таҳлил қилингандан кейин ўрнатилди. Қайд этилишича, икки террорчи-худкуш ҳам ИШИД аъзоси ҳисобланган.

Аввалроқ Туркия бош вазири Аҳмет Довудўғлу ИШИД жангариларининг Анқарадаги терактга алоқадорлиги устувор версия ҳисобланишини айтган эди.

Охирги маълумотларга кўра, Анқарада 10 октябрда намойиш пайтида уюштирилган теракт оқибатида 106 киши ҳалок бўлган.