Туркиядаги Анқара суди ОАВга мамлакат пойтахтида 10 октябрь куни юз берган мудҳиш портлашлар ҳақида маълумотларни тарқатишни тақиқлаб қўйди. Бу ҳақда Hurriyet нашрида ёзилган.

Суд қарорига кўра, матбуот, телевидение, радио ҳимда интернетдаги ҳар қандай ОАВга ушбу теракт бўйича янгиликлар, интервьюлар, танқидий фикрларни нашр қилиш тақиқланган.

Бу қарор Туркиядаги расмий ОАВларда эълон қилинган вақтдан бошлаб кучга кирган. Расмий нашрларда қарорнинг тўлиқ матни эълон қилинган.

Қайд этиш керакки, теракт содир этилишидан кўп вақт ўтмасдан туркияликлар твиттер ва фейсбукка кира олмай қолишганди.

Эслатиб ўтамиз, 10 октябрь куни Туркиянинг Анқара шаҳри марказида курдлар томонидан "Тинчлик ва демократия учун" шиори остида мамлакат ҳукуматига қарши норозилик намойиши учун йиғилган ҳудудда худкуш-террорист томонидан 2 марта теракт содир этилган эди.

Охирги маълумотга кўра, Туркия пойтахтида содир бўлган теракт қурбонлари сони 106 нафарга етган.