Германиялик овчи Зимбабвенинг жануби-шарқидаги Гонараже миллий боғида яшаётган улкан ва кекса филни отиб ўлдирди. The Daily Telegraph нашрининг аниқлик киритишича, бундай йирик фил охирги марта бундан 30 йил муқаддам овланганди.

Қўриқхона ходимларининг маълум қилишича, ушбу овчи 8 октябрь куни 60 ёшли филни отган. У бу овни қонуний ҳуқуқ орқали амалга оширган. Унга бу жониворни ов қилиш ҳуқуқи 60 минг доллар эвазига берилган.

Жониворлар муҳофазаси билан шуғулланувчи Zimbabwe Conservation Task Force ташкилоти томонидан маълум қилинишича, филнинг тиш суяклари вазни 55 кг бўлган.

Бу ов 21 кун давом этган. Овчига бу жараёнда маҳаллий овчилар ёрдам беришган.

"Мен "яшиллик" нималигини биламан. Лекин бу қонуний ов бўлди", дейди овчилардан бири.

Зимбабве гидлар ва профессионал овчилар уюшмаси вакили Луи Мюллернинг The Daily Telegraph нашрига маълум қилишича, овчининг ўзи филнинг улкан тишлари ҳақида уни отиб ўлдирганидан кейин билган. Мюллернинг айтишича, боғ ходимлари бу филни шу вақтгача учратишмаганди.

Нашрда ёзилишича, бу овнинг якуний жараёни акс этган сурат интернетга жойлаштирилгач, жониворлар ҳуқуқларини ҳимоя қилувчиларнинг кескин норозиликларига учраган.

Эслатиб ўтамиз, шу йилнинг июлида Зимбабведаги Нгванга қўриқхонасида машҳур шер Сесил америкалик сайёҳ томонидан отиб ўлдирилганди. Уолтер Палмер исмли сайёҳ-овчи дантист касаллигига чалингани туфайли хатолик билан бу шерни отиб қўйгани айтилганди.