Берлин прокуратураси маҳаллий масжид имоми бўлган россияликни ҳибсга олди, у ИШИД сафига ёшларни ёллашда айбланмоқда, деб хабар бермоқда РИА “Новости” ахборот агентлиги.  

“Биз 14 октябрда Берлинда прокуратура ходимлари томонидан, 30 ёшли Россия фуқароси, маҳаллий масжид имоми Мурод А. исмли шахс ушланганини тасдиқлаймиз. У террорчилик фаолиятини қўллаб-қувватлашда ва масжидга келган ёшларни, асосан чечен миллатига мансуб бўлганларни ҳамда ижтимоий тармоқ орқали ИШИД гуруҳи сафида жанговор ҳаракатларда қатнашиш учун Сурияга юборишга ёллашда айбланмоқда”, деб айтди Берлин прокуратураси вакили.

Прокуратурада қўлга олинган россиялик Доғистондан эканлиги ҳамда русча ва чеченчада яхши гапира олиши маълум қилинди.

Россиянинг Германиядаги элчихонаси матбуот котиби Сергей Беляев айбланувчи ҳозирча элчихонага консуллик ёрдами сўраб мурожаат қилмаганини маълум қилди. 

Охирги маълумотларга кўра, тахминан 2,5 мингга яқин россиялик фуқаро ИШИД аъзоси ҳисобланади.