Шу йилнинг 11 октябрь куни Россия пойтахти Москва шаҳри "CROCUS CITY HALL"мажмуасида XVI Москва халқаро Қуръон қорилари мусобақаси бўлиб ўтди.

Россия мусулмонлари дииний бошқармаси муфтийлар кенгаши раиси шайх Равил Гайнутдин таъкидлаганидек, Москва анъанавий Қуръони Карим мусобақаси дунёдаги нуфузли Қуръони Карим танловлари қаторидан ўрин олган. Унда 44 мамлакатдан Қуръони Карим ҳофизлари иштирок этди.

Саралаш беллашувларидан сўнг 6 нафар мамлакат аъзолари мусобақанинг финал босқичига йўл олди (Жазоир, Эрон, Яман, Кувайт, Саудия Арабистони, Танзания).

Ҳакамлар ҳайъати қарорига кўра, Эрон ислом Республикаси вакили Мусо Мўтамеди қори мусобақа ғолиблигини қўлга киритди. Иккинчи ва учинчи ўринларни яманлик қори Зоид Абдуллатиф Абдуллоҳ Ал-Саноий, ҳамда танзаниялик ҳофизи қуръон – Умар Абдуллоҳ Салим эгаллади.

Маълумот ўрнида, мусобақада бу йили Россия Федерациясидан 16 ёшлик доғистонлик Билол Абдулхолиқов иштирок этди.

XVI Москва халқаро Қуръон қорилари мусобақаси доирасида ислом маданияти ва Қуръони каримнинг тарихига оид кўргазма ташкиллаштирилди.

Кўргазмада Қуръони Каримниг ноёб тарихий нусхалари намойиш этилди. Шунингдек, "Arabic Calligraphi Center Easyarabic" жамияти томонидан тажвид қоидалари ҳақида маҳорат дарслари ташкил қилиниб, ҳаттотлик санъати билан ҳам таништириб ўтилди. Кўргазмага ташриф буюрганлар бу борада ўзларини қизиқтирган саволларига жавоб олишди.

Кўргазма меҳмонлари Саудия Арабистонининг хурмо экспорт қилувчи машҳур "KupiFinik" ҳамда чой ишлаб чиқарувчи "Maqam" корхоналари маҳсулотлари билан танишиш имконига бўлишди.