16 октябрь куни Қозоғистоннинг Бўрабай қишлоғида МДҲга аъзо давлатлар раҳбарлари кенгашининг навбатдаги йиғилиши бўлиб ўтди. Бу ҳақда МДҲ ижроия қўмитасининг сайти орқали хабар қилинди.
Қозоғистон президенти Нурсултон Назарбоев раислиги остида ўтган учрашувда бир қатор халқаро сиёсий ва иқтисодий муаммолар муҳокама қилинди. Тегишли қарор ва келишувлар имзоланди.

Хусусан, БМТ ташкил топишининг 70-йиллиги ҳамда халқаро террорчиликка қарши кураш юзасидан баёнот, шунингдек, Чернобиль АЭСдаги авариянинг 30 йиллиги муносабати билан мурожаат қабул қилинди.

Йиғилишда давлатлар раҳбарларига МДҲда миграцион жараёнларнинг ҳуқуқий таъминоти ҳамда Парламентлараро Ассамблея фаолияти ҳақида маълумот берилди.

Бундан ташқари, 2016 йили “Ҳамдўстликнинг маданий пойтахтлари” давлатлараро дастурнинг амалга оширилиши хусусида фикр алмашилди.

Йиғилиш мобайнида 2020 йилгача МДҲ давлатларининг ҳарбий ҳамкорлиги концепцияси тасдиқланди. Шунингдек, бошқа бир қатор ташкилий масалалар кўриб чиқилди.

МДҲга аъзо давлатлар раҳбарлари кенгашининг кейинги йиғилиши 2016 йил 16 сентябрь куни Қирғизистонда бўлиб ўтади.