Сурия қўшинлари ва уларнинг иттифоқчилари Россия авиацияси кўмагида исёнчиларнинг Ҳалаб жанубидаги позицияларига ҳужумларни бошлаб юборишди. Бу ҳақда Лондонда жойлашган Сурия инсон ҳуқуқларига риоя қилиш мониторинги маркази хабар қилди.

Айтилишича, ҳарбий операция Ҳалаб вилоятининг жанубийдаги қишлоқ хўжалиги ҳудудларида бошланган. Марказ директори Рами Абдураҳмоннинг таъкидлашича, икки томоннинг қонли тўқнашувлари Ҳалабдан 12 км наридаги Жабал аз-Зана деган ҳудудда содир бўлган. Россия авиацияси эса Ҳалабни Дамашқ билан боғлайдиган йўл устидаги объектларни нишонга олди.

Сурия армиясига эронлик юзлаб ҳарбийлар, Ливаннинг “Ҳизбуллоҳ” ҳаракат жангарилари кўмак берди. Аммо қўшин негизини суриялик жангчилар ташкил қилди.
“Бу ваъда қилинган жанг бўлди”, - маълум қилди Сурия ҳарбийларидан бири Reuters агентлигига берган интервьюсида.