Туркманистоннинг Тошховуз шаҳри Мустақил давлатлар ҳамдўстлигининг 2016 йилда маданий пойтахти бўлади. Бу ҳақда МДҲ ижрочи котиби Сергей Лебедов 16 октябрь куни Қозоғистон Республикасининг Кўкшетау шаҳрида МДҲ Давлат раҳбарлари кенгаши мажлисида маълум қилди, дея хабар бермоқда BNews.kz.

“Мажлисда, шунингдек, Ҳамдўстлик мамлакатлари ўртасида маданий алоқаларни мустаҳкамлаш ва МДҲ давлатларининг иқтисодий ва сиёсий ҳамкорлиги учун қулай шароит яратиш мақсадида 2016 йилда “МДҲ Маданий пойтахтлари” давлатлараро дастурини амалга ошириш масаласи ҳам кўриб чиқилди”, - деди у.
Унинг сўзларига кўра, келгуси йилда ушбу шаҳарда маданият мавзусидаги қатор тадбирлар ташкил этилади.

Эслатиб ўтамиз, аввалроқ давлатлар раҳбарлари Қирғизистон Республикасининг 2016 йилда МДҲ раислиги, навбатдаги кенгаш йиғилиши эса 2016 йил 16 сентябрь ойида Қирғизистонда бўлиб ўтиши тўғрисида қарор қабул қилишган эди.

Кун тартибида жами 17та масала кўриб чиқилди. Хусусан, БМТ ташкил топишининг 70 йиллиги ҳамда халқаро террорчиликка қарши кураш юзасидан баёнот, шунингдек, Чернобиль АЭСдаги авариянинг 30 йиллиги муносабати билан мурожаат қабул қилинди.