Аввалроқ марҳум совет актёри Евгений Леоновнинг машҳур “Омадли жентльменлар” кинокомедиясидаги Доцент лақабли бош жиноятчи образида ишланган, Москвадаги Мосфильм кўчасидаги ҳайкали ўғирлаб кетилгани маълум қилинганди.

Интернетда ушбу жиноят содир этилаётгани кузатиш видеокамералари томонидан қайд қилинган видеоёзув ҳам пайдо бўлди.Камералар жиноят содир этилаётган пайтни, гумонланувчилар ҳайкални “Газель” юк машинасига ортиб, воқеа жойидан ғойиб бўлганларини ёзиб олган.

Ушбу жиноят юзасидан полиция Москвада 5 кишини қўлга олди. Бу ҳақда Москва ИИБ матбуот хизмати бошлиғи Андрей Галиакберовга иқтибос келтирган ҳолда РИА “Новости” ахборот агентлиги хабар бермоқда.

“Москва ИИБнинг Ғарбий округ ходимлари тезкор-қидирув тадбирлари ўтказиш давомида Евгений Леоновнинг ҳайкалини ўғирлашда гумон қилинган 5 кишини қўлга олди”, дейилмоқда хабарда.

Қайд этилишича, қўлга олинганлар қўзғатилган жиноий иш доирасида сўроқ қилинмоқда, ҳайкалнинг ҳозирдаги ўрни аниқлаштирилмоқда.