Аввалроқ марҳум совет актёри Евгений Леоновнинг машҳур “Омадли жентльменлар” кинокомедиясидаги Доцент лақабли бош жиноятчи образида ишланган, Москвадаги Мосфильм кўчасидаги ҳайкали ўғирлаб кетилгани маълум қилинганди.

Ушбу ўғирлик бўйича жиноят иши қўзғатилди ва тезкор гуруҳ ҳаракати натижасида ҳайкал рангли металл қабул қилиш пунктида бўлакларга бўлинган ҳолда топилди. Бронзадан ясалган ҳайкал бўлаклари далилий ашё сифатида олиб қўйилди.

Ушбу жиноят юзасидан полиция Москвада 5 кишини қўлга олган.

Аниқлик киритилишича, бу шахслар Ўзбекистон фуқаролигига эга бўлган.

Улар қиймати 160 минг рублга баҳоланган ҳайкалнинг бир қисмини яқин жойдаги металл қабул қилиш пунктига топшириб юборишганига иқрор бўлишган.

Леоновнинг “Омадли жентелменлар” кинокомедиясидаги персонаж кўринишидаги ҳайкали 2001 йилда ўрнатилган эди.