Туркия ҳукумати ўз ҳудудида Европа пуллари эвазига қарамасдан ҳам муҳожирларни қолдиришни истамаяпти. Бу ҳақда Туркия ташқи ишлар вазири Фаридун Синирлиўғлу айтиб ўтди. Бундан Reuters ахборот агентлиги маълум қилмоқда.

Журналистларнинг саволларига жавобан Синирлиўғлу Анқара қочқинлар қочишга мажбур бўлаётган мамлакатлар ичида хавфсизлик ҳудудларини яратиш тарафдори эканини таъкидлаб ўтди. Туркия ТИВ раҳбари Европа Иттифоқи билан муҳожирлар инқирозини ҳал қилиш бўйича келишув фақатгина муҳокама босқичида турганини айтиб ўтди. Вазирнинг айтишича, у европаликларни фақатгина чегараларни мустаҳкамлаш бу муаммони ҳал қилишга имкон бермаслигига ишонтиришга уринмоқда. 

Туркия президенти Ражаб Тойиб Эрдўған европалик мансабдор шахсларни қочқинлар муаммосининг кўламини кеч англаганликда айблади. Эрдўғаннинг айтишича,  муҳожирлар инқирози Туркия иштирокисиз ҳал қилина олмас экан, унда Туркия Европа Иттифоқига қабул қилинса ҳам бўларди.

Аввалроқ 16 октябрда Европа Иттифоқи Туркияга муҳожирлар билан боғлиқ вазиятни ҳал қилиш учун 3 млрд евро бериш ва виза тартибини юмшатишни ваъда берди, шунингдек, Туркиянинг ЕИга кириши бўйича музокараларни қайта бошлаш кўзда тутилганди.