Киевнинг "Динамо" жамоаси футболчиси Андрей Ярмоленко "Шахтёр" футболчиси ҳамда ўзининг терма жамоадаги сафдоши Тарас Степанкони қаттиқ ранжитди. У "Шахтёр"га қарши учрашув якунидан кейин ўзи билан футболкасини алмаштирган Степанконинг либосини ерга улоқтирган. Бу ҳақда UA-Футбол нашри хабар берган.

Маълум қилинишича, ўйин якунида футболчилар анъанавий тарзда футболкалар алмашишган. Степанко ҳам шундай таклиф билан Ярмоленконинг олдига келган, киевликлар аъзоси ундан футболкасини олган ва бироз юриб, либосни майса устига улоқтирган.

16 октябрь куни Киевда ўтказилган бу учрашувда меҳмонлар йирик ҳисобда (3:0) ғалаба қозонишди. "Шахтёр"га ғалаба келтирган голларга Марлос Ромеро ва Алекс Тейшейра муаллифлик қилишган. Бу 1991 йилдан бери "Динамо"нинг ўз майдонида "Шахтёр"дан бундай йирик ҳисобда мағлуб бўлиши эди.

"Шахтёр" бу ғалабадан кейин "Динамо" билан очколарини тенглаштириб олган (28та) ва тўплар нисбатига кўра турнир жадвалининг биринчи поғонасига кўтарилган.

Эслатиб ўтамиз, Ярмоленко 16 октябрь куни "Динамо" билан янги 5 йиллик шартнома тузди.

Бундан олдинроқ, ушбу футболчига "Арсенал" ва "Барселона" жамоаларидан қизиқиш бўлаётгани хабар қилинганди.

Ёзги трансферлар вақтида "Динамо" ушбу футболчисини "Сток Сити" ва "Боруссия Д" жамоаларига сотмаганди.