Airbus компанияси Лондондан Нью-Йоркка бир соатда етиб оладиган самолётни патентлаштирди. Бу ҳақда Fox News телеканали хабар бермоқда.  

Самолёт “Конкорд-2” деган ном олди. Патентга кўра, товуш тезлигидан тезроқ ҳаракатланувчи бу реактив самолёт учта алоҳида двигателлар комбинациясини қўллаши натижасида ҳаво оқимлари орқали ўта олади.

ОАВ маълумотларига кўра, самолёт 2003 йилда парвозлари тугатилган оригинал “Конкорд” самолётидан 3 марта тезроқ уча олади. Биринчи “Конкорд”нинг максимал тезлиги 2179 км/соатни ташкил қилган.

Патентдаги маълумотлардан Airbus янги самолётдан биринчи навбатда ҳарбий мақсадларда фойланишни режалаштираётгани келиб чиқади. Самолёт салонида 19 тагача йўловчи жойлаша олади. Бироқ патентдан лойиҳа қачондир тижорат ташувлари соҳасида амалга оширилиши ҳақида ҳеч нарса аниқ эмас.