Шимолий Корея АҚШдан 1950-1953 йилларда, Корея урушининг охирида имзоланган ярашув ҳақидаги келишув ўрнига тинчлик битимини тузишни яна талаб қилди. 17 октябрда, АҚШ президенти Барак Обама ва Жанубий Корея президенти Пак Кин Хе учрашгандан кейин чоп этилган Шимолий Корея ташқи ишлар вазири баёнотида “бундай чора Корея яриморолидаги кескинликни камайтиришга ва узоқ муддатли тинчликни таъминлашга кўмак беради”, деб таъкидланмоқда.   

“Айни пайтда Қуролсизлантирилган ҳудуддаги демаркацион чизиқ ҳудудида юзага келадиган исталган ихтилоф бошқариб бўлмайдиган катта кўламдаги ҳарбий ҳаракатларга айланиб кетиши мумкин”, деб айтилмоқда баёнотда.

Баёнотда қайд этилишича, авваллари Корея яримороли муаммосини олти томонлама музокаралар (Шимолий Корея ва Жанубий Корея, Хитой, Россия, АҚШ ва Япония иштирокида) доирасида тартибга солишга уринишлар “натижасиз якунланган ва ҳаттоки музокараларда эришилган келишувлар ҳам амалга оширилмаган”. Шимолий Корея бу ҳолат учун “Шимолий Кореяга душманча сиёсатдан воз кечишни истамаётган” АҚШ жавобгар эканлигини айтмоқда.

Пхеньянда Корея яриморолида барқарор вазиятга эришиш учун Вашингтон “ярашув келишуви ўрнига тинчлик битимини тузиги керак”, деб ҳисоблашмоқда. Баёнотда Шимолий Корея ва АҚШ “уруш хавфини бартараф этиш ва ядровий қуролланиш пойгасига чек қўйиш учун ўзаро ишонч чораларини кўриши ва принципиал келишувга эришиши лозим”, деб таъкидланмоқда.