АҚШнинг Arcimoto компанияси SKR деб номланган шаҳар электромобилини намойиш этди. Уч ғилдиракли автомобиль икки йўловчига мўлжалланган бўлиб, нархи 11900 долларни ташкил этади.

Шаҳар электрокарига иккита электр двигатель ўрнатилган бўлиб, улар 12 киловатт-соат ҳажмли литий-ионли аккумулятор жамланмасидан қувват олади.

Двигателлар қуввати маълум қилингани йўқ, бироқ Arcimotor SKR турган жойидан соатига 96 километр тезликка эришиши учун 7,5 сония керак бўлишини айтиб ўтган. Электромобилнинг энг юқори тезлиги эса соатига 136 километрни ташкил этади.

Такомиллаштирилган SKR учун ҳажми 20 киловатт-соатли аккумулятор ҳам тақдим этилиб, у бир марталик қувват билан 208 километр масофани босиб ўтишга етади. Шунингдек, мижозлар автомобилнинг ортида махсус бўлмаси бўлган юк ташувчи намунасига ҳам буюртма беришлари мумкин.

Wired нашрининг маълум қилишича, SKR расман мотоцикл ҳисобланади, шунинг учун электрокарга автомобилларга қўйиладиган хавфсизлик талаблари шарт эмас. Шу билан бирга, уни бошқариш учун ҳайдовчилик гувоҳномаси АҚШнинг бир нечтагина штатида талаб этилади.

Arcimoto компанияси SKR устида ташкил этганидан буён ўтган 8 йилдан бери шуғулланиб келган. Унинг савдоси эса АҚШда 2016 йилнинг охири, 2017 йил бошларидан йўлга қўйилади.

2014 йил декабрида DeltaWing компанияси ҳам уч ғилдиракли электромобилини ишлаб чиқишга киришган эди. Тахминларга кўра, модел нархи 15 минг долларни ташкил этади. Шунингдек, Elio Motors ҳам арзон уч ғилдиракли электромобиль ишлаб чиқиш устида изланиш олиб бормоқда. Унинг қиймати 6,8 минг долларни ташкил этиши керак. Бунда унга 0,9 литрли бензинли мотор ҳам ўрнатилиб, ёнилғи сарфи юз километр учун 2,8 литрни ташкил этади.