Эронда юз берган йўл-транспорт ҳодисасида 20 нафар афғонистонлик муҳожир ҳалок бўлди, яна 10 нафари жароҳат олди, деб хабар бермоқда Франс Пресс ахборот агентлиги.

Эрон пойтахти Теҳрон ва Қум шаҳри ўртасидаги трассада афғонистонликлар кетаётган микроавтобус юк машинаси билан тўқнашиб кетган, деб хабар берди полиция вакили. ЙТҲ сабаблари маълум қилинмаган.

Агентлик маълумотларига кўра, Эрон ҳукумати қўшни Афғонистондан радикал террорчилар сабаб ўз юртини тарк этаётган афғонларнинг оммавий равишда Эронга келаётганидан хавотирланмоқда. Маҳаллий ОАВлар маълумотларига кўра, Эронда 2 млнга яқин афғон миллатига мансуб қочқинлар ва ишчилар бор, улардан ярмида ҳужжатлар йўқ. Кўп афғонлар Эрон ҳудуди орқали Туркияга ва у ердан Европага ўтишга ҳаракат қилмоқда.