Голливудлик машҳур режиссёр Стивен Спилбергнинг ҳамкасби, 59 ёшли Патрик Киннининг ўғли “Ал-Қоида”нинг Суриядаги бўлими ҳисобланган “Жабҳад ан-Нусра” террорчилик гуруҳи жангарисига айланди. Бу ҳақда The Daily Mail нашри маълум қилди.

26 ёшли Лукас Кинни исмли бу кимса Абу Басир ал-Британий тахаллуси билан жиҳодга қўшилишга чорловчи иккита видеода суратга тушди.

Нашрнинг маълумотларига кўра, жангари католик мактабида таълим олган ва 13 ёшида руҳоний бўлмоқчи бўлган. Унинг отаси Спилберг билан бир қатор блокбастер, жумладан “Индиана Жонс ва охирги хоч юриши” фильмининг суратга олиш ишларида бирга ишлаган.

Жангарининг онаси Дебора Фиппс The Daily Mail нашрига унинг ўғли авиазарбалар натижасида ёки худкушлик оқибатида ўлиб кетишидан хавотирда эканлигини айтган.