АҚШ Давлат котиби Жон Керри Мадридга ташрифи давомида Испания бош вазири Мариано Рахой билан Сурия, Ироқ, Украинадаги вазият ва Европадаги қочқинлар муаммосини муҳокама қилди, деб хабар берди АҚШ Давлат департаменти расмий вакили Жон Кирби.

Хусусан, Суриядаги вазият ва ИШИДга қарши кураш муҳокама қилинди. Керри Испанияга Ироқда полициячиларни тайёрлашдаги ёрдами ва “Европада ўсиб бораётган муҳожирлар инқирозидаги қўллаб-қувватлаши” учун миннатдорчилик билдирди.

“Керри ва Рахой Украина борасида Минск келишувларининг тўлиқ бажаралиши кераклигини, ҳозирда тайёрланаётган Трансатлантик шериклик савдо келишувини муҳокама қилишди”, деб қўшимчи қилди Кирби.

Бундан ташқари, музокараларда 1966 йилда бортида термоядро қуроли бўлган АҚШнинг B-52 бомбардимончи самолёти фалокатга учраши ҳақидаги масала кўтарилди.
Фалокат оқибатида Испаниянинг Паломарес шаҳри яқинидаги ҳудуд плутоний билан зарарланган эди. Керри АҚШ “келгусида ҳам ушбу фалокат оқибатларини бартараф этишда ёрдам беришга тайёрлигини” маълум қилди ва бу ҳақда тегишли меморандум имзоланди.