Янги техника турли шошилинч вазиятларда фавқулодда хизматларнинг ҳаракатчанлиги ва тезкорлигини таъминлайди. Биринчи партияда 14 дона техника тақдим этилади.
Ўзбекистон ФВВ GM Uzbekistan заводи билан ҳамкорликда вазирлик техника паркини тўлдиришга хизмат қиладиган енгил синфга оид авария-қутқарув машиналарини сотиб олади. Бу ҳақда Sputnik агентлиги вазирликнинг авария-қутқарув кучлари бошқармаси бошлиғи подполковник Шухрат Азимов маълумотига асосланиб хабар берди.
Агентлик суҳбатдошининг сўзларига кўра, айни пайтда техник масалалар тайёрланган бўлиб, имкони туғилса, шу йилнинг ўзида махсус жиҳозланган 14 дона енгил синфга оид автомобиллардан иборат синов партияси сотиб олинади.
Янги автомобиль махсус лойиҳалаштирилган техник бўлмали “Дамас” базасида тайёрланади. 5 нафаргача экипаж аъзоси билан биргаликда, транспорт воситаси қутқарув ишлари жараёнида фойдаланиладиган барча зарур ускуна ва аслаҳа-анжомлар билан таъминланади.
Енгил авария-қутқарув транспортини тўлдириш ва жиҳозлаш ишларини мазкур соҳага ихтисослашган бошқа компаниялар амалга оширади. Шу мақсадда ФВВ Ўзбекистон бозорида ишлаётган фирмаларни тендер асосида танлайди.
ФВВ ҳисоб-китобларига кўра, бугунги кунда республика миқёсидаги мавжуд барча 17та авария-қутқарув бўлинмасига 2-3тадан худди шундай машиналар зарур. Вазирлик автопаркида 3 синфга оид махсус транспорт воситалари мажуд. Енгил синга мансубларидан ташқари, 9 нафар экипаж аъзоси бўлган оғир ҳамда 7 кишидан иборат ўртача синф техникалари фаолият кўрсатади. Харид қилинган замонавий техникалар сафида маҳаллий “МАН” шассиси базасида бунёд этилган иккита катта ва битта “Исузу” базасида қурилган ўрта синфга мансуб техника ҳам мавжуд. Шундай қилиб, бугунги кунда ФВВ бўлинмаларининг замонавий техника ва асбоб-ускуналар билан таъминланганлиги даражаси 97 фоизни ташкил этади.
Қутқарувчилар учун техник воситаларнинг катта қисми хориждан, Европа ишлаб чиқарувчиларидан сотиб олинмоқда. Вазирлик мутахассислари доимий равишда чет элдаги йирик кўргазмаларда иштирок этиб, соҳадаги янгиликлар ва трендларни кузатиб боришмоқда. Уларнинг кўпчилиги дастлаб синов партияси сотиб олиниб, апробациядан ўтганидан сўнг эса амалиётда кенг қўлланилмоқда.