Исроилдаги Hummus Bar ресторани битта стол атрофида ўтириб овқатланган яҳудий ва араблар учун чегирмалар таклиф этмоқда. The Times Of Israel хабар беришича, муассаса раҳбарияти мамлакатда миллатлараро кескинлик кучайган вазиятда аҳилликда яшаш тамойилларини шу йўл билан тарғиб этишмоқчи.

Ресторан Нетания шаҳри яқинидаги Кфар-Виткин мошавида жойлашган бўлиб, яҳудий ва араблар бирга ўтирган столларда нўхотли пастанинг ҳар бир порцияси учун 50 фоизлик чегирма таклиф этилади. Hummus Bar ўз рекламасида хумус ва фалафел сингари таомларни истеъмол қилишлари мумкинлигини ҳам айтиб ўтди.

Шунингдек, меҳмонларга, улар қайси дин вакили бўлишидан қатъи назар, бепул қўшимча хумус олишлари мумкинлиги келтирилди.

Ресторан вакилларининг сўзларига кўра, акция ўзининг ижобий самарасини бермоқда.