Мамлакатларнинг ўзлари имзолаган халқаро ҳужжатлар ва ўз зиммасига олган мажбуриятларга ҳурматсизлик билан қараши Афғонистонинг Қундуз шаҳридаги “Чегарасиз шифокорлар” касалхонасининг АҚШ қўшинлари томонидан бомбардимон қилиши, оқибатда 22 кишининг ҳалок бўлгани каби оғир фожиаларни келтириб чиқаради. Бу ҳақда Жаҳон соғлиқни сақлаш ташкилоти (ЖССТ) бош директори Маргарет Чен маълум қилди.

“Мени Женева конвенциясига бўлган ҳурматсизликнинг ортиб бораётгани хавотирга солмоқда. Давлатлар конвенция ортидан конвенцияларни имзолашмоқда, бироқ улар бажарилмаяпти. Бу жамоатчилик учун катта чақириқдир. Агарда сиз ниманидир имзоласангиз, биз уни адо этишингизни кутамиз”, - деди Чен журналистларга можаролар вақтида тиббиёт инфратузилмаларига уюштирилган ҳужумлар билан боғлиқ вазиятга изоҳ берар экан.

Ченнинг сўзларига кўра, фақатгина 2014 йилда 600 нафардан зиёд тиббиёт ходими ҳарбий можаролар давом этаётган ҳудудларда ҳалок бўлди. Шунингдек, дунёнинг 32 мамлакатида қарийб минг нафар шифокор жароҳат олган.

Эслатиб ўтамиз, 2015 йилнинг 3 октябрь куни АҚШ ҳарбий-ҳаво кучлари томонидан "Чегарасиз шифокорлар" ташкилоти касалхонасига ҳаводан зарба берилиши оқибатида 22 киши, жумладан, аёллар ва болалар ҳалок бўлган эди. Яна 37 нафар киши, хусусан ташкилотнинг 19 нафар ходими жароҳатланган.