Суриядаги Россия Қуролли кучлари ҳарбийлари орасида ҳеч қандай йўқотишлар йўқ, деб маълум қилди 20 октябрда Россия Мудофаа вазирлиги матбуот хизмати бошқармаси.

“Хорижий ОАВларда Сурияда россиялик ҳарбийлар ҳалок бўлгани ҳақида пайдо бўлаётган хабарлар билан боғлиқ ҳолда шуни маълум қиламиз: Суриядаги Россия Қуролли кучлари ҳарбийлари орасида ҳеч қандай йўқотишлар йўқ”, деб айтилмоқда хабарда.

Аввалроқ Рейтер агентлиги “юқори лавозимли ҳукуматдаги манба”га иқтибос келтирган ҳолда Сурия армиясининг Латақиядаги позициялари ўққа тутилиши оқибатида уч нафар россиялик ҳарбий ҳалок бўлганини маълум қилган.

Россиянинг Дамашқдаги элчихонасида ҳам бу хабар инкор этилди ва бу навбатдаги ахборий хуруж эканлиги айтилди.

Бир қатор хорижий ОАВлар аноним манбаларга иқтибос келтирган ҳолда бир неча бор Россиянинг Суриядаги операцияси давомида шунга ўхшаш воқеалар бўлгани ҳақида хабар берган, бироқ уларнинг бирортаси расмий тасдиғини топмаган.