Швейцария Мудофаа вазирлигида Швейцариянинг F/A-18 ҳарбий самолёти Женевага учиб кетаётган россиялик дипломатлар самолётига яқинлашиб, стандарт текширув амалиётини бажарган деб айтилди. Бу ҳақда РИА “Новости” ахборот агентлиги маълум қилди. 

Буни Швейцариянинг мудофаа, фуқаролик хавфсизлиги ва спорт бўйича федерал департаменти матбуот котиби Питер Миндер маълум қилди.  

“Биз учун бу оддий тадбир. Бу самолёт Швейцария қуролли кучларининг Биль шаҳридан 10.20 да ҳавога кўтарилган F/A-18 ҳарбий самолёти бўлган. Самолёт Женевага учиб кетаётган Россия самолёти рақамини текширган. Бу стандарт амалиёт ва ҳеч қандай хавфли яқинлашиш бўлмаган”, деб айтди Миндер. 

Миндернинг айтишича, Швейцария Қуролли кучлари қарорига кўра, дипломатик рейслар, шу жумладан Россия, АҚШ ва Франциядан бўлганлари ҳам танланма асосда текширилади. 

Аввалроқ Франция самолёти Россия самолётига яқинлашгани маълум қилинганди, бироқ Франция бу самолёт Швейцарияга тегишли эканини айтган.