Хитой жанубида 3 нафар ўсмир ўғирлик вақтида қотиллик жиноятини ҳам амалга оширишди. The South China Morning Post нашрида ёзилишича, улар муаллимани ўлдиришган.

Бу воқеа 18 октябрь куни Хунань вилоятида рўй берган. 11-13 ёшлардаги бу ўқувчилар мактаб атрофида айланиб юришганида машинасида бир ўзи ўтирган аёлни кўриб қолишган ва унга ҳужум қилиш фикрига келишган.

Улар аввалига аёлни ёғоч калтак билан савалашган, кейин унинг оғзини боғлаб, ҳожатхонага қамаб кетишган. Шу жойда 52 ёшли аёлнинг жони узилган.

Ўсмирлар эса, ўз қурбонининг ёнидан телефон ҳамда 2 минг юань пулни олиб кетишган.

Қайд этилишича, бу безори болаларнинг ота-оналари Хитойнинг улкан шаҳарларидаги саноат корхоналарида ишлашади. Улар ишга кетган вақтда болалар деярли қаровсиз қолишади ҳамда жиноят йўлларига кириб қолишади.

Айни вақтда Хитойда ўсмирлар ўртасидаги жиноятчилик кўлами кескин ортган.