БААнинг Zarooq компанияси ўзининг биринчи модели - Sand Racer пойгачи йўлтанламасини дебютга ҳозирламоқда. Унинг тақдимоти ноябрь ойида Абу Дабидаги Формула-1 Гран-приси пайтида ўтказилади.
Янги машина ҳақида тўлиқ маълумот йўқ. Йўлтанламас дизайни устида Lykan Hypersport суперкари муаллифи Энтони Янарелли ишлагани айтилди, холос.

Йўлтанламас конструкциясида кўмир-пластик кенг қўлланади. Машина массаси 950 кг ни ташкил қилади. Zarooq Sand Racer’нинг мотор бўлимида 3.5 л ли 6 цилиндрли двигатель жойлаштирилади. У модификацияга қараб 300-500 от кучи бериши мумкин бўлади.

Машинани умумфойдаланиш йўлларига ҳам олиб чиқиш мумкин бўлади. У мижозларга 2016 йилдан етказиб берила бошлайди. Дастлабки 20 экземпляр махсус модификацияда чиқарилади. Унинг нархи 80-160 минг доллар ўртасида.