36 ёшли британиялик Шелли Кристофер ўзининг 42 ёшли ҳамхонаси Ричардни вампир (айрим халқлар эътиқодига кўра қон сўрувчи арвоҳ)га айланмаслиги учун ёғоч тўқмоқ билан 29 марта калтаклаган. Унинг София исмли қизига ҳам олти марта зарба берган. У қизга қалам билан ташланганида, София аёл чангалидан қочиб, ҳаётини сақлаб қолган.

Ҳодиса 2015 йилнинг февраль ойида бўлиб ўтганига қарамасдан, аёл октябрь ойидагина суд олдида суроқ беришни бошлаган. Кристофер сўзларига кўра, қотилликдан бир неча кун муқаддам у Лондондаги психологик ёрдам марказига мурожаат қилган. Психологга кимдир унинг ортидан кузатаётганини маълум қилган. Даволаш таклиф этилганида, Кристофер буни рад этиб, уйига қайтган.

Gurdian нашрининг ёзишича, Кристофер ўз айбини тан олгани йўқ. Аёл қотилликни унинг хонаси шифтига ўрнатилган лампанинг топшириғига кўра амалга оширганини айтмоқда.
Унинг ҳолатини текширган психиаторлар Кристофер психоз ва параноидал шизофрениядан азият чекади, деган хулосага келишди. Айни пайтда у ёпиқ руҳий касалликлар шифохонасида.