АҚШ ҳукумати Ироққа жангариларга қарши кураш кўрсатилаётган ёрдамни тўхтатиши мумкинлигидан огоҳлантирди. Агар Ироқ ИШИДга қарши курашда Россиядан ёрдам сўраса ва Россия Ироқ ҳудудига кирса, АҚШ кўмагидан маҳрум бўлади. Бу ҳақда АҚШ Қуролли кучлари штаблари бошлиқлари қўмитаси раҳбари Жозеф Данфордга асосланиб, "Интерфакс" хабар берган.

"Мен шуни айтишим керакки, агар россияликлар Ироқ ҳудудида ҳарбий амалиётлар ўтказишни бошласа, биз сизларга ёрдам беришда давом этишимиз иложсиз ишга айланади", дейди Данфорд.

Унинг айтишича, америкалик ҳарбийлар Ироқда россиялик ҳарбийлар билан параллел равишда ҳарбий амалиётлар ўтказа олмайди.

Бироз олдинроқ, Данфорд Ироққа ИШИДга қарши кураш муаммосини муҳокама қилиш учун йўл олгани ҳақида хабар берилганди.