Ўзбекистоннинг биринчи ракеткаси Денис Истомин Россия Федерацияси пойтахти Москва шаҳрида давом этаётган теннис бўйича “Кремль Кубоги” турнирининг яккалик бюаҳсларидаги иштирокини бошлади. Турнирнинг мукофот жамғармаси 771,525 АҚШ долларини ташкил этади.

Истомин бугун яккалик баҳсларининг илк даврасида Альяж Беденега қарши кортга чиқди. Асли словениялик бўлган 26 ёшли Бедене ҳозирда Буюк Британия шарафини ҳимоя қилмоқда. Таққослаш учун, Истомин дунё рейтингида 53, Бедене эса роппа-роса 50-ўринни эгаллаб турганди.

Учрашув Истомин устунлигида ўтди ва у 6:3, 6:3 ҳисобида зафар қучди.

"Оламспорт.сом" нашри хабарига кўра, энди Истомин иккинчи даврада турнирнинг биринчи ракеткаси Марин Чиличга қарши баҳс олиб боради. Дунё рейтингида 14-ўринни банд этган хорватиялик теннисчи турнирнинг биринчи ракеткаси бўлиш билан бирга амалдаги мусобақа ғолиби ҳамдир.

“Кремль Кубоги-2015” ғолиби 127 минг доллар мукофот пули ҳамда 250 рейтинг очкосига эга бўлади. Финалчи эса 66,900 доллар ва 150 рейтинг очкоси билан тақдирланади. Биринчи даврада иштирок этган ҳар бир теннисчи натижадан қатъий назар ўз ҳамёнини 7,210 долларга бойитиб олади.