Украина президенти Пётр Порошенко ноябрь ўртасида Киев АҚШда ишлаб чиқарилган узоқ таъсир қилиш радиусидаги батареяга (бир неча тўп ёки миномёт билан қуролланган бўлинма) қарши радарлар олишини маълум қилди. Бу ҳақда Порошенко Ивано-Франковскдаги олий таълим муассасаларидан бирининг талабалари билан учрашуви давомида айтиб ўтди, деб хабар бермоқда “Интерфакс-Украина” ахборот агентлиги.

Порошенконинг айтишича, Вашингтон шу тариқа Киев билан эришилган келишувларни амалга оширмоқда. “Мен Барак Обама билан учрашганимдан кейин ноябрь ўрталарида бизга узоқ масофадаги махсус батареяларга қарши станция келишидан жуда фахрланмоқдаман”, деб таъкидлаб ўтди Порошенко.

Порошенко янги қурилмалар мамлакатнинг мудофаа қобилиятини мустаҳкамлашга имкон беришига ишончи комиллигини айтди. “Фронтгача 10 километрлаб йироқдан душман бизга қаердан ўт очаётганини аниқлашимиз мумкин”, деб айтди Порошенко.

Пентагон июлда Украинага 24 км дан 50 км гача радиусда бўлган рақиб батареяларини аниқловчи батареяларга қарши радарларни етказиб беришга қарор қилган эди. Ушбу қарор Оқ уйга тасдиқланиш учун юборилган эди.

Бунгача Вашингтон Украинага аниқлаш радиуси 9,5 км бўлган 20 тага яқин миномётларга қарши радар юборган. Киев, шунингдек, АҚШдан тунги кўрув асбоблари, дори-дармон қутилари (аптечка) ва бронежилетлар олган.