Тошкент вилоятининг жиноят ишлари бўйича Қибрай туман судида кўплаб жиноятларни содир этишга айбланиб келаётган жиноий гуруҳ аъзолари устидан ўтказилган суд якунланди. “Огоҳ” нашрининг ёзишича, жиноятчилар узоқ муддатларга озодликдан маҳрум қилинган.

Гуруҳ раҳбари 1971 йилда туғилган Улуғбек Баҳодиров эди. У ўз атрофига 1975 йили туғилган укаси Тошпўлат Баҳодиров, 1993 йили туғилган Тоҳир Муродов, 1994 йили туғилган Асрор Тимуров ва Умид Ҳамдамов, 1992 йили Фарҳод Мирсайидовлардан иборат гуруҳни тўплади. Шунингдек, 1988 йили туғилган Динара Абдиеванинг машинаси борлиги туфайли гуруҳ таркибига жалб қилган.

Дастлабки “иш”ни гуруҳ шахсий уйга кириб, 3.5 млн сўм ўғирлашдан бошлашган. Кейинчалик бундай ишларни улар бир неча маротаба такрорлаб, машиналар ва хонадонлар ичидаги уйларда талончилик қилиб келишган.
Ўз қилмишлари давомида гуруҳ аъзолари уй ва машина эгаларини қўрқитиб, ҳатто уларга жароҳат ҳам етказишган. Шу боис улар ўнлаб одамларга азият етказишда айбланди.

Охирги сафар Баҳодиров бошчилигидаги гуруҳ Spark машинасини ўғирлашга муваффақ бўлди. Машина Сирғали бозорига олиб чиқиб сотилаётганида гуруҳнинг барча аъзолари ҳуқуқ-тартибот ходимлари томонидан қўлга олинди.