Россия парламентарийлари делегацияси пайшанба, 22 октябрь куни Сурияга йўл олади. Бу ҳақда РИА “Новости” агентлиги делегация раҳбари, Россия Федерал кенгашининг мудофаа қўмитаси аъзоси Дмитрий Саблин маълумотига асосланиб хабар қилди.

Қайд этилишича, парламентарийлар Сурия президенти Башар Асад ва мамлакат ҳукумати билан учрашув ўтказишни режалаштирган.

“Биз Сурия президенти Башар Асад, САР парламенти раҳбарияти билан учрашиб, музокаралар олиб боришни режалаштирганмиз”, - деди Саблин. Шунингдек, сенатор делегация таркибига депутатлардан Сергей Гаврилов ва Сергей Ищенко ҳам ўрин олганини айтиб ўтди.

Учрашувлар вақтида инсонпарварлик юклари, жумладан, дори-дармон ва болалар озуқаларининг етказилиши масалалари ҳам муҳокама қилинади.

Эслатиб ўтамиз, 20 октябрь куни Москвага ташриф буюрган Сурия президенти Башар Асад россиялик ҳамкасби Владимир Путин билан учрашди. Унда икки томон Россиянинг Суриядаги ҳарбий операциясини давом эттириш масаласини муҳокама қилишди.