Венесуэла президенти Николас Мадуро нефть ишлаб чиқарувчи давлатларга махсус мактуб йўллаб, ушбу маҳсулотнинг жаҳон бозоридаги нархларини назорат қилиш масаласини муҳокама қилиш учун саммит тўплаш таклифини билдирди.

Ушбу тадбирда нефть ишлаб чиқарувчи давлатлар ташкилоти (ОПЕК) аъзолари, шунингдек, нефть картелига кирмайдиган давлатлар раҳбарлари иштирок этиши кўзда тутилмоқда.
“Мен давлатлар ва ҳукуматлар раҳбарларига мактуб йўлладим... Нефть бозоридаги тенденцияларни муҳокама қилиш учун улар билан тўпланишни таклиф қилдим”, - деб шарҳлади бу янгиликни Мадуронинг ўзи.

Маълумки, нефть бозоридаги беқарорлик ўз иқтисодиётини “қора олтин” экспортига қураётган давлатларда жиддий қийинчликлар туғдирмоқда. Мадуронинг фикрича, бозорда бир баррель нефть нархини 70-80 доллар даражасида ушлаб туриш зарур.