Интернет-қидирув бозорида улушга ва йирик веб-ресурсларга эга Yahoo компанияси Google компанияси билан унинг қидирув ва реклама технологияларидан фойдаланиш борасидаги келишувни яна давом эттиришни режалаштирмоқда. Бу келишув АҚШ савдо кимиссия томонидан 2008 йилги антимонопол тафтиш доирасида тўхтатиб қўйилган эди, деб хабар бермоқда VentureBeat нашри.

Yahoo ўз фойдаланувчиларини Google қидирув тизимига жўнатади. Компания шу билан бирга Microsoft билан Bing қидирув тизимидан фойдаланиш бўйича келишувини ўз кучида қолдиради, бироқ унга жўнатиладиган фойдаланувчилар сони камайиши мумкин. Шунингдек, Google компанияси Yahoo’га ўз ресурсларида контекст рекламани кўрсатиш технологиясини тақдим қилади. Yahoo компанияси Google’га веб-қидирув ва тасвирлар бўйича қидирувга ҳақ тўлайди. Google эса Yahoo’га десктоп ва мобиль қурилмаларда реклама кўрсатганлик учун ҳақ тўлайди. Шунингдек, Yahoo ўзининг реклама технологияларини ўзининг контекст, медиа ва видеорекламани сотиб олиш универсал алгоритмик тизими BrightRoll доирасида Google’нинг технологиялари билан бирлаштиради.