Avtotest компаниясининг маълум қилишича, автомактаб машинасининг йўл ҳаракатини бузиши билан боғлиқ воқеа бўйича тегишли чоралар кўрилди.

Ўқув марказида ушбу ҳолат юзасидан лойиҳа раҳбарияти ва масъул ходимларнинг шошилинч мажлиси ўтказилган ва қоидабузар инструкторга нисбатан Ўзбекистон Республикаси қонунчилигида кўзда тутилган маъмурий чоралар кўрилган.

"Қоидабузарга нисбатан қатъий чора кўрилди, у маошининг 50 фоизлик қисмидан маҳрум бўлди. Шунингдек, у ўзи томонидан йўл ҳаракати қоидаси бузганини тан олган ҳолда ўз ихтиёри билан ЙҲХДБ (Йўл ҳаракати хавфсизлиги давлат бошқармаси) идорасига бориб, 65120 сўм миқдоридаги жаримани тўлади", дейилади компаниянинг фейсбукдаги саҳифасида.

Махсус мажлисда ходимлар фаолияти сифатини яхшилаш бўйича режа асосида ҳаракат қилиниши, мактабнинг бошқа ходимларига бу воқеа ибрат бўлиши кераклиги айтиб ўтилган.

"Биз барчага огоҳлик ва эътибор учун миннатдорчилик билдирамиз", дейилади хабарда.

Эслатиб ўтамиз, 21 октябрь куни ижтимоий тармоқларда Тошкентда яқинда ўз фаолиятини бошлаган “Avtotest” инновацион автомактабига тегишли ўқув машинаси пойтахт кўчалардан бирида йўл ўртасидаги босиш тақиқланган иккита тақиқловчи чизиқни босиб ўтаётгани акс этган суратлар чоп этилди. Бу сурат фойдаланувчилар орасида катта баҳс-мунозарага сабаб бўлди.