БМТ Тараққиёт дастури ва Евросиё тараққиёт банкининг янги эълон қилинган қўшма ҳисоботида таъкидланишича, яқин вақт ичида Ўрта Осиёдан Россияга келувчи меҳнат муҳожирларининг миқдори фақат ўсиб боради.

“Марказий Осиё мамлакатларида миграция, пул ўтказмалари ва инсон ривожланиши” номли ҳужжатда бу борада айниқса Тожикистон ва Қирғизистондаги тенденциялар жиддий эканлиги таъкидланди. Муҳожирларнинг пул етказмалари ушбу давлатлардаги ЯИМнинг қарийб 50 фоизига тенгдир.
Таъкидланишича, бу борадаги энг муҳим омил Россия ва Ўрта Осиё давлатлари даромадлардаги улкан тенгсизликдир. Ҳатто инқироздан сўнг ҳам Россиядаги маошлар Ўрта Осиёдагига нисбатан анча катта бўлиб қолмоқда.

Бундан ташқари, Россиядан сўнг ҳалқа бўйлаб минтақа давлатларида ҳам доллар курсининг ўсиши ва пулнинг қадрсизланиши кузатилмоқда. Шу тариқа, Россияда ишлаб топилган пуллар маҳаллий валютага ўтказилганда, улар оилани боқишга етарли суммага айланмоқда. Шу билан бирга, муҳожирларга эҳтиёж Россияда ҳамон катталигича қолмоқда. Чунки чет элдан келаётган муҳожирлар россияликларнинг аксарияти маъқул кўрмайдиган соҳаларга ўзларини урмоқда.

Яна бир омил – муҳожирлар Россия меҳнат бозорида “ўрталик” вазифасини бажаради. Яъни, ишчи кучига талаб ўсиши, инқироз ёки тушкунлик ҳолларида улар биринчи бўлиб иш ўринларини йўқотади.
Ҳисобот муаллифларининг бир овоздан таъкидлашича, миграция соҳасидаги сиёсатни пухта ўйлаб амалга ошириш лозим.

Элдор Асанов тайёрлади