Туркия президенти Ражаб Тойиб Эрдўған ноябрда бўлиб ўтадиган G20 саммитида Россия президенти Владимир Путин билан Суриядаги инқирозни муҳокама қилишни режалаштирмоқда.

21 октябрда Путин Эрдўған билан телефон орқали Суриядаги вазиятни муҳокама қилди ва бир кун аввал Сурия президенти Башар Асад билан учрашув ўтказганини маълум қилди. Президентлар, шунингдек, Анталияда ноябрда бўлиб ўтадиган G20 саммитидаги учрашувда бу ва бошқа масалаларни батафсилроқ муҳокама қилишга келишиб олдилар.

“Биз Путин билан телефонда суҳбатлашдик. Путин менга Сурия бўйича муносабатини билдирди. Биз 15 ноябрда Анталияда G20 саммити доирасида учрашиб, бу муаммони батафсил муҳокама қилишга қайтмоқчимиз”, деб айтди Эрдўған Анқарада ҳуқуқшунослар билан учрашувида.

Эрдўған Россиянинг Сурия бўйича позициясидан тўлиқ қониқмаганини қўшимча қилиб ўтди. Хусусан, Анқара Россия ва АҚШ турк ҳукумати Туркияда тақиқланган Курдистон ишчи партияси билан алоқадорликда айблаётган Суриянинг курд демократик иттифоқ партиясини террорчилик ташкилоти деб ҳисобламаётганидан ташвишланмоқда.