Европа ташқи сиёсат хизмати бош котиби Ален Ле Руа 18-20 октябрь кунлари ташриф билан Тошкентда бўлди. Жаноб Ле Руа билан бирга, Европа Иттифоқининг Марказий Осие бўйича Махсус вакили элчи Петер Буриан ҳам Ўзбекистонга келган.

Жаноб Ле Руа ва элчи Буриан Ўзбекистон бош вазирининг биринчи ўринбосари ва Молия вазири ҳисобланмиш Рустам Азимов, Ташқи ишлар вазири Абдулазиз Комилов ва Ташқи иқтисодий алоқалар, инвестициялар ва савдо вазири ўринбосари Шавкат Тўлаганов билан учрашувлар ўтказишган. Ташриф чоғида улар ЕИ томонидан молиялаштирилган Тошкент шаҳридаги ривожланиш лойиҳасида ҳам бўлишган ва мамлакатда рўйхатдан ўтган ҳалқаро ташкилотлар ва дипломатик миссиялар вакиллари билан ҳам учрашувлар бўлиб ўтган.

Музокаралар давомида жаноб Ле Руа суҳбатдошлари билан турли соҳалардаги, шу жумладан хавфсизлик, қишлоқ тараққиёти, таълим, инсон ҳуқуқлари, энергетика, сув ресурсларини бошқариш ва иқтисодий алоқалар бўйича Европа ва Ўзбекистон ҳамкорлик масалаларини муҳокама қилган.

Ўзидан олдин ташриф буюрган европалик мансабдорлар каби, жаноб Ле Руа Европа Иттифоқининг Ўзбекистондаги сиёсий, иқтисодий, ижтимоий ва давлат бошқаруви ислоҳотларни қўллаб-қувватлашга муттасил тайёргарлигини айтиб ўтди.

Европалик дипломатлар Ўзбекистон томонига самимий кутиб олгани учун миннатдорчилик билдириб, Европа Иттифоқи ва Ўзбекистон ўртасидаги алоқаларнинг янада ривожланишига ва ҳамкорликнинг янги соҳалари очилишига амин эканликларини изҳор этишди.