Германия ГФР томонидан бошпана беришга ижозат этилмаган қочқинларни депортация қилиш жараёнини тезлаштириш ҳақида қарор чиқармоқчи. Ушбу мақсадда нафақат йўловчи, балки ҳарбий-транспорт самолётларидан ҳам фойдаланиш режалаштирилмоқда. Бу ҳақда Reuters агентлиги маълум қилди.

Германия парламенти октябрь ойида ушбу масала кўзда тутилган қонун лойиҳасини қабул қилиши кутилмоқда. У тасдиқланса, 1 ноябрдан кучга киради. Натижада Германияда бошпана берилишига ижозат этилмаган муҳожирлар яширинишга уринмасликлари учун олдиндан огоҳлантирилмасдан депортация қилинади.

“Агарда қочқинларнинг бу ерга келишига фақатгина иқтисодий омиллар сабаб бўлса, биз уларга ортингизга қайтинг, деб айтишимиз шарт”, - деди Германия канцлери Ангела Меркел. Хабарларга кўра, йил охирига қадар яна 800 минг нафарга яқин киши кириб келиши мумкин.